قلبي اللي بالهوى ربي بلاه

في حبيبن ياكثر ناسن تبيه

كل يوم يزيد في عيني حلاه

ومابقى في الزين شين ماهو فيه

هذا حالي ياعرب والله معاه

ادري انه هو سبب همي وابيه

بين وينه او ياليته او عساه

عني لاهي وانا دوم اسال عليه

خذت قلبه وهو قلبي خذاه

واشتكى مني وانا منه اشتكيه

ومااشك بطيب قلبه او وفاه

بس من زود الغلا اشره عليه

وش اسوي بللي واثق من غلاه

يدري اني اعشقه واموت فيه

هو يزعلني وانا ادور رضاه

وان تركته رد قلبي في يديه