لا عاد تنشد ما بقى عندي علوم كل العلوم المبطيات تخَبْرْها !!

ما جيتك أشكي ميلة الوقت مزحوم نفسي ليا ضاق المدى ماخسرها !

ياصاحبي كنت امس كنت امس محشوم واليوم هجّ بجيّتك وإختصرها !

خلّك بعيد أبعَد من العام لليوم وأدنى من احلام النجوم وقمرها !

بعض الكلام اللي تحليّه مسموم وما كلّ كفٍ صافحتْك تغدرها !!!!

كم طيّبٍ ساقته الاقدار لرخوم ويا كثر ناسٍ تنخدع في صورها !!!!

والحرّ ما يشره على خنعة البوم الله رفع شانه ووطّا قدرها !!!

لا جيتني كنّك على الوجه ملطوم بعض الخطايا عذرها ما غفرها !!

عندي تساوت هرجة العذر واللوم هذيك مبغاها وذيك أحتقرها !!

زلّه وعدّت ما حَدَتني عن النوم مرّت سلام .. وبعّد الله كدرها !!

أنا اعتبرها كبوة حصان ويقوم وإنت ... إعتبرها زيّ ... ما تعتبرها