في نفس من يهواك مرتع ومرباع ... يامشغل التفكير صورة خياله

جرحتني في القلب في ساعة وداع ... جرحي نزيف ولا لقينا دوا له

أحس كنه ينزع الروح نزاع ... والموت في عيوني تهايا ظلاله

والا كما هم تكسر في الاضلاع ... نفسي حداها من هواها زواله

آمنت في أمره واعطيته الطاع ... وهو يعذبني على كل حاله

راعي جبين في دجا الليل لماع ... وخد كما البراق ياضي اشتعاله

العين عين الي خذور ومرتاع ... والعنق عنق الي يذيره خياله

تورد على يّم غزير ونّباع ... غر من آلارام صعب مناله

مابين قلبي والفكر دايم صراع ... كنه على روحي تهافت اهواله

ياما رفعت الصوت لكن ماشاع ... صوت يردد بالصدى في جباله

ويهيج اشجاني الي هب ذعذاع ... ليت النسيم ييب منهم رساله

لا في الهوى رحمه ولا منك مفزاع ... يامشغل التفكير صورة خياله