يمكن فيه دنيا مشوفنهاش

أيامها حلوة معشنهاش

يمكن نصيبي وقسمتك

لسه ف علم الغيب مجاش

الدنيا نصها هيّا، على كيفك تشكّلها

وحضنها كله حنيّة بتترمي فيه وتشكيلها

تعيش بسلامة النيّة، لا ناس لا مودّة ولا رحمة

مشاعر تايهة ف الزحمة، طيبتها سر مشاكلها

تعدي عليها ليلة العمر لحظة ف وقتها حلوة

وتسرق فرحة بيها تمرّ وتسرح مرة مع غنوة

ليه تفضل بس شاربة المر وتدعي؟ يارب صبرها

وكتر الهم كبّرها، وهيّا لا حول ولا قوة!

الوحدة زي طلوع الروح ومتهيألي لأ أصعب

دي واحدة قلبها مجروح، ودي من غلبها بتتعب

وناس تيجي وناس بتروح ودي لسه على حالها

لا حد سألها يوم مالها ولا على قلبها طبطب

حياتها الحب، لو حسّاه بكلمة شكر تتأثر

وعشقها مستحيل تنساه، تهون عشرتها تتحسّر

تعيش بعد الفراق مأساة، تشوف كل البشر غامضة

وتعمل نفسها جامدة وجوة قلبها مكسّر