ياداعج العين والحيات مقرونة

والخد براق ليل في الدجى التالي

فيك الحلاوة والجمال اللي يحيدونه

وتحوز عن جملة الأرام ياغالي

محبتك داخلية في القلب مضمونة

ولا بد أصبر على مكنون غربالي

والقلب منك العواذل لو يعذلونه

مايستمع عذل من جا عنك عذالي

لو للهوى شرع في تحكيم قانونه

ماكنت مظلوم في تعذيب ونكالي

شوفك يعالج جروح القلب وطعونه

والموت ياصاح من تعذيبك أشوالي

راعي يديل سبيب كاسي امتونه

متعثكل فوق متني ردفه العالي

العين عين أشقر للصيد مضمونه

مطلوب مرغوب لو كان الثمن غالي

والخد جنديل يسني من سنا لونه

مشراق ضي يشابه نور لهلالي

مبعد خلاوي عن اللي هم يرودونه

يتعب ودونه نزو المبعد الخالي

لي يال طاريك همت بروح مشطونه

عليك واصفج ابراحة كفي الخالي

مثل الذي هام بصحرى مايدلونه

عليه منها زريج ابزوم شلالي

ياناس خلوه المشتاق لا تلومونه

ما كان ينلام من مثلي على حالي