فمان الله يا أول من سكن بين الضلوع العوج

عسى دربك سفير وياعسى الله مايخليني

توكل لاتوادع... رح عسى درب الجفا المسهوج

يصادف درب فرقى عقبها ماتلمحك عيني

سمحت من الهوى ومن القصيد ومن زراق الموج

ورميت اغلى مجاديف الغرام وجيت بيديني

ابغرق في عذابك لارحلت ويصبح المنتوج

قصيدٍ في حياتي سلوتي وان مت يرثيني

واذا هبن بنات الريح للذكرى بدون سروج

ابسرج مهرة النسيان وارحل من عناويني

وابنسى لين اسج وبرسل الونات فوج وفوج

وبنسى دمع عيني ينتثر وانساك من حيني

صبور... اي والله اني ما ثنيت العزم قبل ادوج

بريضان الجفا واظما لوصلك لين تسقيني

شجاع.... اي والله اني ماعرفت الذل قبل اسوج

قدم رجلي على دربٍ لبيت اهلك يوديني

كريم... اي والله اني ماعرفت الشح قبل تروج

دموعي في عيوني واشح بحسرتي فيني

احبك... حسبي الله ليت مالك في سماي بروج

ولا لك في البسيطة كود شيءٍ بينك وبيني

دخيلك لاتلفت رح بفالك واترك المرجوج

تغانم مابقى لك ولا انا ماعاد يمديني

فمان الله سق ركبك على درب السنين العوج

لكن طالبك لا اقفيت عني لاتخليني

كلمات/ ضيدان بن قضعان اليامي

غناء / حسين العلي