مع السلامة يا ابتسامة الزهر

مع السلامة يانسيم الحياة

مع السلامة يا ارتعاشة مصر

انت الشهيد اللي اتقتلنا معاه

انت بتبعد للبعيد

واحنا باصرارنا العنيد

رسمنا وشك شمس عيد

ضحكة وليد شهقة نشيد وطن جديد وطن سعيد

والاسم مصر

يا صرخة تصعد للعلا وتبوح

من القسوة علي ارض الحياة والبشر

هانت عليك الروح وقولت تروح

تدق باديك قلب باب القدر

بعت الحياة بالموت

ولا انت بالموت اشتريت الحياة

ووقفت للجبروت

ووقفنا بعدك مرفوعين الجباه

اتمد يا دراع الشهيد اتمد

وشهد الناس والشموس والاله

ماهو انت كنت همنا

واحنا همك ياشهيد

دمك بقي من دمنا

ورسمنا وشك سمش عيد

ضحكة وليد شهقة نشيد وطن جديد وطن سعيد

والاسم مصر