أبا اعز الدموع اللي غشت خدي عقب فرقاك
واداوي نزف جرح سال دمه من شراييني
وأعز النفس عن حبك مدام اني عجزت القاك
تعبت من الصبر واتعبت من كثر السهر عيني
تعبت استعطفك وارجيك وامشي في سبيل رضاك
تلعبي على كيفك تبعدني و تدنيني
تحملتك وأنا صابر و أدور لك عذر لخطاك
ولكن ما نفع صبري معك واليوم يكفيني
خلاص اليوم قررت انسحب من دنيتك واسلاك
ابرحل ما التفت لو صاح لي صوتك يناديني
ابرحل للبعيد اللي ينسيني اسى ذكراك
وبترك كل شي منك لا شفته يبكيني
و بخفي عنك وين ارحل ولا تسأل علي هناك
إذا قادك فضولك يوم انسى انك تلاقيني
بعوض ما مضى لي من سنين عشتها وياك
كفى ما ضاع من شانك من احلى و اجمل سنيني
أبركب مركبي وأبحر وأدور لي بدل مرفاك
شواطيك الكئيبة حطمت كل الأمل فيني
بكن الهم في صدري و أسافر للبعيد هناك
عسى الأيام والغربة من جروحك تداويني
صحيح بغربتي بتعب ولكن في سبيل انساك
بعزي بالصبر نفسي ولو محد يعزيني
نعم مليت نكران الجميل وطبعك ومبداك
وقلت البعد عنك ارحم مدامك ترفض تجيني