انا أبويا واحشني جدا

محتاج رأيه في حاجات

أهمل في سُؤاله عني

وما جاش من يوم ما مات

نظارته وساعته لسه

عالرف مكان ما سابهم

وهدومه جوه كيسهم

وجداد من يوم ماجبهم

نفسي أتكلم معاه

واحكي له عاللي تم

وهقوله مين في مرضه

زاره ونقل له دم

وهقول له اني آسف

علشان خبيت عليه

واحلف له بإني نفسي

لو يوم ألمس ايديه

واعمل له شاي خفيف

واقسم وياه رغيف

كان حضنه جمعنا لمه

كان صوته في ونس

وكتير بقعد معاه

واشكيله من الحياة

انا عارف انه سامع

متأكد انه حس

ماهو برضه الموت لا يمكن

يقتل في الناس شعورها

ومافيش في الدنيا شجره

تقطعها من جذورها

ومافيش في الدنيا راحل

الا وسايب وراه

واحد من صلبه شبهه

يدعلي له في الصلاة

أنا أبويا واحشني

واحشاني معاه حاجات

بطلت اعملها وحدي

من ساعة لما مات