من بعد ما سابني من فترة وانا دموعي كما المطرة

ولا نافع دوا دكاترة، ولا وصفة من عطارين

من غيره يا ناس انا في غرقة، حياتي وهو فيها فارقة

برغم عنيه مهيش زرقا وقمحاوي ويادوب تلتين!

دانا مضيع عليه خزايني و لَمْ جفِّت دموع عَيْني

وبسمع مزيكا حزايني يا عين يا ليل يا ليل يا عين

بقوم من نومي بندهله، وهوّ بيصحى على مهله

لا عارف انساه ولا اتجاهله، مطبق صاحي بالليلتين

بتخايل بيه رايح جاي يقولي سبتني ازاي

وبعمل قهوة، بعمل الشاي، بقيت بعملي كوبايتين!

دانا مضيع عليه خزايني و لَمْ جفِّت دموع عَيْني

وبسمع مزيكا حزايني يا عين يا ليل يا ليل يا عين

ده ايه ده بس موضوعه، مفيش منه خلص نوعه

بصلي وبدعي برجوعه وزرت الأوليا الصالحين

بضحكته كنت بتبارك، في غيبته مفيش طريق سالك

لا عارف هذا ولا ذلك دا هوّ اللي عليه العين