خلي الهواء يدخل

وزي الهواء ينساب

شتل الحياة المخضر

لو مرة عانا يباب

جاي جاي بيصبر

لامن يلاقي سحاب

لكن بيذبل صر

ضي الشمس لو غاب

جاييك من اخر الريد

مشيا على الاشواق

عز الليالي البيد

انست نورك باق

خبيت مشاعري شديد

الدروخه الساساق

وكل مالك انت بعيد

وتوميلي بالاطواق

ليه تفتح الابواب

للجاك عديل ودنا

داير عينيكي قراب

وتبقيو دار ودنا

لو بالمحبة حباب

ابن الملوح انا

لو بالنغم زرياب

وماخلى فيكي غنا

لو بالعلم ده كتاب

مفتوحلك الف سنة

لو بالضراب دي حراب

عنتر مدارقو هنا

لو بالرسم جذاب

عند امو كل جنى

لو ماالشمس كضاب

البدري يضوي سنا

ولو بالقرش وين جاب

ماجاب براهو هنا

بالله كم حطاب

تمنى حالو منى

يابت بلا استغراب

تكشحلي جور وضنا

وانا اجدر الخطاب

واكتر قلوبا عنا

راجيك تقولي حباب

ياريدتي هاك كفنا

فالدنيي غير احباب

غيم الضباب دفنا