عافية منك وراضية عنك سو رضايا
وما بيخيب الرضا والدتو يا جنايا
أنت من يا دوب صغير من زمان دايماً معايا
أنت ديمه أمامي ساير ما بخليك بي قفايا
ما بتغيب من عيني لحظة ولا حصل سبتك ورايا
لا من الله يشيل أمانتوا أنا ببقي خاصاك بالرعاية
ليَ يرعاك البيرعي ليَ بيك يبرد حشايا
أصلك أنت هديه منو والله بيك أجزل عطايا
جيتني واحد مالي تانى رحمه في آخر صبايا
قبل ما أفقد قدرتي وقبل ما تنهار قوايا
جيتني ذي بدر منور وفجأة طليت في سمايا
انت لما خلاص كبرتا دار تسيبني أعيش برايا
دار تفارقني وتسافر والحزن يصبح جزايا
كيف يهون لك تحزن أمك شان تحقق ليك غاية
كان مسافر شان علاجي بلقي في شوفتك دوايا
وكان عشان تسقينا نهلك نحن بي حنك روايا
كان عشان كرعينا راحل نحن بي بعدك حفايا
كان مهاجر شان تعرس خير أبوك مالي التكايا
خيرو وافر أبوك يحمدوا مراحو مليان بالسعايا
وبالقروش الجيب مجكن ولسه برضو الجايا جايا
برضي منك ما بقصر بحفر أديك المعايا
كان ده كلو كمان شُويّ بتلقي في دهبي الكفايا
أصلي من سويتو ناذرا إبقي لي أيام قسايا
خاتا للزمن البعاند لي سعادتك يا عشايا
أنت من شبيت صغير راسي ما بتحتاج وصايا
ما حصل خيبتا ظني ولا فشل فيك زين غنايا
لا تسيب أمك تهاجر يمه محتاجي الحمايا
لا تسيبني وراك ترحل إنت ياك ضُلي وضرايا
أنت فوق الحوبة مقنع إنت للمكشوف غطايا
دايري منك تبقي جنبي . جنبي في فرحي وبلايا
دايري كان قحيت اتبنك ارفع اقسملك غتايا
أنت ساعة تبقي جنبي تبقي ضُلي وتوب قفايا
وما بخاف ظلم الليالي وأنت ياك عكاز عمايا
دايري أقضي عميري جنبك أصلو قارب للنهايا
خايفي كان سافرتا ترجع تلقي فاضي البيت بلايا
حينا ما بتنفع قروشك وما تجيب لك أم سوايا
ماني عارفي سبب رحيلك يا وليدي شنو الحكاية
إلا تبقي براك شايف في فراق الوالدة غايه
ما بعاتبك وما بلومك لو رحلت بلقي في الأمثال عذايا
علي حجر دايماً قليبك وقليبي كله عليك جنايا