اكتشف الجديد دخول
الشاغلين فؤادي وتايهين فايقين

يكفي البى زارف دمع المآيقيين

تال القبلة شايف لي برقا لمع

والصيد في الخمايل ياناس اجتمع

قوموا يا أحبة نسترق السمع

ما بطيق القعدة والمايق دمع

البلابل صاحت في الليل الهجيع

سهرانات عيوني وجافيت الضجيع

من الحاله ديه اولا لي النجيع

وا حسرة شبابي الما لقيت لي وجيع

كلف احبابى لي يا مولاي قدروا

انسلبت لحومي واعضائى خدرو

لاموني العوازل بى حالي ازدروا

هم تايهين دلالن ساهين ما دروا

سامرت الكواكب لما الفجر لاح

منادى الفجر نادى وقال ياهل الصلاح

صلوا الوقت حاضر قام أهل الصلاح

وانا الليل قايمو لا خيال لي راح

النسيم عاودني أقوم من نومي تاب

مشغول فكرى حاير مشطوب انشطاب

يا نسيم بالله تجيب رد الخطاب

اوع الجاهلة نية وما بتحمل عتاب

حليل القدرو سامي فوق الجيل فريد

حليل روحي بقت ليه طوق في الوريد

بكتب ليه خطابي وعذري عذر مريد

يا نسيم بلاهي طبق ليه البريد

انكسرت اعضائى من كسرة الولوع

وابكي العبره خانقه وانا ليها البلوع

أصبح قلبي يرجف خلى من الخلوع

يا ناس روحي شاهقة هيه ناوية الطلوع