المجرشة

ملا عبود الكرخي

ذَبيت روحي عالجرش وأدري الجرش ياذيها

ساعة وأكسر المجرشة وألعن أبو راعيها.

ساعة واكسر المجرشة وألعن أبو السواها

إشجم سفينة بالبحر يمشي ابعكسها اهواها

إيصير أظلّن ياخلكك متجابلة آنه وياها (متجابلة – اجلس قبالتها او امامها )

كلما يكيّرها النذل آني بحيلي ابريها (يكيرها – يجعل لها اخاديد لمرور الطحين خلالها )

8

ساعة واكسر المجرشة واكصد أبو الحملة علي (الامام علي ابن ابي طالب)

واطلب مرادي وانتحب بلجي همومي تنجلي

نار البكلبي اسعرت يهل المروّة وتصطلي

ما شفت واحد ينتخي من اهل الرحم يطفيها.

ساعة واكسر المجرشة وألعن أبو اليجرش بعد

حظي يهل ودّي نزل والجايفه حظها صعد

سلّمت أمري واسكتت للي وعدني ابهالوعد

نصبر على الدنيه غصب للّحد وانباريها.

ساعة واكسر المجرشه واشغر أنا لسابع سمه (اشغر – ارفع بصري الى السماء)

وادعي على الجان السبب أمي وأبوي بالعمه

أم كَشره وام بوز الجلب جي يرضه ربي امنعمّه (ام كشره – صفة تحقير او تصغير تطلق على النساء )

كعدّها بأعلى مرتبه وجوخ وزري يجسيها. (جوخ – نوع غالي من القماش)

ساعة واكسر المجرشه وألعن أبو راعي الجرش

كعدت ياداده أم البخت خلخالها يدوي ويدش (يدوي ويدش – يحدث صوتاً)

وآني استادي لو زعل يمعش شعر راسي معش

هم هاي دنيا وتنكضي وحساب أكو تاليها.

ساعة واكسر المجرشه والبس لباس التنتنه

جي فوكك درد الله، النذل استادي ضربني بميجنه (اداة خشبية تستخدم في عصر التمور وتستخدم لاغراض العجين)

بالهيمه عطشان الأسد والهوش معتاش ابهنه (الهوش - البقر )

هل مال أبو هدلان للدجله شرب صافيها.

ساعة واكسر المجرشه وانحر على النمسا ومجر

هناك أنكر تبّع وقحطان والطائي ومضر

ترضه يالمسيّر سفينة نوح يا رب البشر

عبّيات ابو ها اكحيله واحضان الجرد يشبيها.

ساعة واكسر المجرشه واقسم أنا برب الفلق

ويللي ابطن الحوت ابن متي النبي يونس نطق

كلّه كتبته بالورق عندي فقط إلا الزلق (مثل شعبي عراقي له قصة ظريفة سأحاول كتابتها لاحقاً )

ما قيدتها بدفتري اوغيري فلا قاريها.

ساعة واكسر المجرشة واكطع من الدنيا الأمل

للجرش ما أرجع بعد إلا بابره يخش جمل

كل يوم ناصبلي عزه استادي النغل ما الثوَل (عزة – مأتم )

عقلي انذهل جسمي نحل روحي السكم لافيها. (السكم – المرض ,لافيها - يسكنها)

ساعة واكسر المجرشة واصعد برجلي للفلك

واوصل السابع سما وبيدي ألزمه للملَك

من يوم أمص جمعي، الدهر لاحكك على عمري وكللك (جمعي – اصبعي )

يعبّر عليّ. كل وكت للملعنه يجزيها.

ساعة واكسر المجرشه وانحر على أهل الصيره (الصيرة – الصويرة وهي منطقة ريفية عراقية)

وانشد على شيوخ العرب أهل الشيم والغيره

يرضى إلهي بالرفاه العبده أم خنفيره

تخدمها حُرّه وكل وكت كاس الصبر تسكيها.

ساعة واكسر المجرشة وألعن أبو الكيّرها

واحركك أبو كل من ابمنشاره وفاسه انجرها

بعناد هالظالم استا دي رويحتي مرمرها

للكفر يا أهل الرحم إبن الزنه يقرّيها.

ساعة واكسر المجرشه وألعن أبو اليكطع مَهر

طفله على شايب هرم يفطن على حفر البحر

وصله سختيانه الوجه واللحية تشبه للأبر

الله ما يقبل هالبشع لرويحتي سابيها