تعالى نلضم أسامينا

الفلة جنب الياسمينة

قنا سوهاج الاسماعيلية

بنت الصعايدة بحرية

الاقصر غزالة محنية

في اسكندرية ترسينا

انا رشيدي و دمياطي

و اخدك يا منصورة ف باطي

و اغني و ارقص سنباطي

قبل القمر ما ينسينا

و عدي عالجيزة خفاجة

وردان دموعي الخفاقة

عيوني طلت يا رفاقة

من وادي حلفا علي المينا

عاضفتين القى ربوعي

و عيد ميلادي و سبوعي

من كوم حمادة ينبوعي

لجرجا ابريق الزينة

بلبيس حنلبس دبلتها

شربين شربنا في قلتها

بعد المحلة ما حليتها

بنها العسل راح يشفينا

و دنشواي اسمها اصبح

اقل شاهد بيسبح

ف المنزلة الضي بيرمح

و ف بحر يوسف سواقينا

و الشاي يا واسطى في السكة

نقعد يا منيا علي الدكة

توصل بني سويف الضحكة

نلاقي اسيوط وسطينا

عصرت قلبي الجواني

علي التراب الاسواني

رجع يا نوبة عنواني

كوم امبو رايقة و امينة

و طنطا شي لله يا سيد

و طهطا نفرح و نشيد

و نزور مغاغة و نعيد

في بورسعيد عالتراسينة

من السويس قلت ياللي

دي القنطرة فجر التملي

و الوز الاخضر بيصلي

علي القناية من سينا

تعالي نلضم اسامينا

الفلة جنب الياسمينا