علمونا في المدارس جمله بتقول العلم نور

كتبوها علي الجدران ومن بره المدرسه ع السور

والسور كناية عن حجب الرؤيا من البداية

من بره بيقول حكم وجوه كدب ملوش نهاية

فقدت الجملة معناها ومغزاها

حالها كحال المناهج حفظناها وما فهمناها

انا مش قادر اعيد ايامي انا مش قادر افضل في مكاني

واقف في طابور بين الجماهير مستني دور في مسرح كبير

بحيي العالم وبقول يا بلادي ومن قلبي بصرخ وبنادي

يا بلادي انا فين اكون انا خايف من بكره المجنون

علموني وعيشوني في تاريخ بعيد في فعل كان

ولوحدي سابوني ورموني للمستقبل والايام

واختاروا طريقي وربطوا ايدي وخلوا العلم ظلام

انا مش قادر اعيد ايامي انا مش قادر افضل في مكاني

تحكم عليا ازاي وتقولي كام عمرك

دنا عيشت يوم بسنين يساوي طول عمرك

صبري مفتاحه انكسر عدلك بقي شئ من الاثر

والحقيقه ان حلمي عن عالمكم انفصل

هو الحق كده دايما غاوي نكد

غاوي يقول بلاوي ويفضح في اللي سكت

امسك يوم لسانك يبقى الاسم باطل

اوعى تسيب مكانك مين للحق فاضل