ضليت ..

هرب منى الأمل .. جنيت

جافانى الشروق .. حنيت

كنتى معايا .. فى لمّة

دليب .. شاشاى

فى إيقاع حشا المردوم

فى جيد الزمن .. سوميت

مرقت .. على محطات

السفر .. غربة

وما لقيتك .. أمل شارد

مع إنك معاى

فى زحمة المشوار

وحتى يقينى عاد من تانى

صحّاك من حنين ذاتى ..

نجم الفرحة يا عايد

تعالى معاى....

من زفة نفس مسدار

وما جرتق فرح .. كانت

ولا طعم الشقا الروّح

خطاى هانت

وإنتى معانى شايلاها القوافى

معزة فى عمق الفرح .. دوبيت

وكت ضليت ...

قعدتّ براى .. وحسيتك

بتطلعى من نفس طورية

ضامّة الطين

ومن دمعة وجع طوّل

ندا العرق البنادى .. حنين

واناديك وانت في ذاتي ..

مخاوف سكة آهاتي

مداين قرية لابسة القمرة شامة ضو

يحن يغشاها مرة شروق

يخدر من عرق تربال ..

يرتاح في ضليل واسوق ..

ينادي تراب

يغازل خدرة السيال

تطلُ شروق ..

تكون قمر السعد ضويت ...