ماقلت لي يالغلا وشحالها عيونك

ترقب طيوفي أو إن النوم غالبها

ماقلت لي انته تحب ومنهو مظنونك

واللي تحبه احاسيسك يحس بها

هذا سؤالك عسى الله يكون في عونك

ريح حياتك وجنبها مصايبها

مادمت سالي وتجهل من يحبونك

ترجم شعورك وهاذي من غرايبها

مابان فيك الغلا ولاهيظ شجونك

ولاشفت عيني وكيف النوم حاربها

ترقب طيوفك وانت عايش فكونك

وانا على حسرتي وانت سبايبها

أصبر القلب واترياك واصونك

واعقد عزومي على باجر واراقبها

واقول يمكن تغيث وتمطر مزونك

والأرض تزهر وتتحقق مطالبها

شمس الاماني اخاف تغيب من دونك

تنسى المجره ومشرقها ومغربها

والنور يصبح ظلام وتتعب عيونك

وأنا عيوني على شوفك أحاسبها