معتوهة و معتقة و منعتقة

نوافير انتشاء وحشة و حمار العين

تنقى من البيوت السكلبة

تضحك كلما وقعت مصيبة

تمشى على العجين و تلخبطو

ترطن اذا جاها الحنين

يا بت بيوت الهجعة كيف

غبار شوارعك ماشى وين

زقاق يفتش فى زقاق

كتمة و ضلمة و انعتاق

انا فيك لامونى المساجين

سكاتك منازل حلال الحرام

سكاتك على وكتين اهش الحمام

سكاتك عليك لما تصحى المسام

و سكاتك عليهم سكوت و السلام

صوتك وكت قطع البحر قبال مراكب العمدة

ضهر النيل عرق و الشمس فوق حبل الغيوم

شرت جلاليب النعاس ناشف غرب مبلول شرق

و المطرة زى شفع العيد تدخل غرف كل البيوت

حكمة الجوع الشرح للارضة

كيف تقرا المرق و قبال يقع فوقك سقف

اتنحنح الجالوص امرق على مهلك

مروق الحنة من ضفر العروس

و اصعد على مهلك

صعود البذرة و الروح و الشموس

مبنية مدن الخوف من طينة اخر اللسل

و انا فى سقالة الشوف قدح البصيرة تقيل

فاتح زريبة الجوف تمرق تخش الخيل

على كيفها كيف معلوف ضهر المظنة يشيل

و انا ظنى ظنيتو لا النيل غريق فى النيل

و الليل و لا فى بالو ليل ساكت يغنوا على القمرة

و اجعنى فى البحر السكات و سكتنى فى الوجع البحر
يابت صباح الطير وين البلد ركت

ما عاد هواك يفتح فى الكتمة شباك النزيف

وين تكتيك فى الغيمة شطيف النجزم ريف الجسد

صدرك سبلوقة اللبن الخريف

داسينى فيك نضر و الانبياء فاتوا

و انبياء بين بين قاعدين فى ضل النار

داسينى فيك نضر و فى غفلة جو الكفار

و طارت حمامة الغار لا قونى ناشف و مر

ما ذنب حلد الطار لو غنوا بيهو شتر

ما تخافى الله معاك و الملائكة سمر