اكتشف الجديدالفنانين
دخول
ود الرضي

الناحر فؤادى .. مولع جوفى حر

أضرم نار وجدى .. نسَّام السحر

دامع لجَّ طرفى .. ياأبطرفاً سحر

و البسم المُفلَّج .. للأكباد نحر

لا يبرد حميمى .. لو أحسى البحر

دارى و ماك دارى .. يا سمح النحر

ما أطراك حبيبى .. إلا و قلبى فر

أتلظَّى و أكظُم .. الغيظ الوفر

ينعش روحى طيبك .. لو محيك سفر

زى مابىَ تفعل .. ذنبك مغتفر

أدرى البىَ .. يامن ساقينى الجرر

إنى المن غرامك .. عرضه لكل ضرر

شاغل غير شاغل .. بى سوحك مرر

علَ أَسمعن .. من فاهك درر

أبصر طرفى طرفك .. حاكى طرفى المطر

وقلبى كأنه طيره .. خافق و أنفطر

أحذروا يا أحبه .. حب الريم خطر

يكفى البىَ اصل .. من حالى الفِطر

بان لعينى شخصك .. و النوم إنحجر

و المايق تملىَّ .. غير خاطرى إنفجر

من فولاذ قليبك .. وكبدك من حجر

ما أحلاه عندى .. إن زار أو هجر

كل أذآى ياطبيبى .. فى جوفى إنحصر

حُبك خلَ عقلى .. و العود إنهصر

مالى إليك إلا .. قولاً مختصر

العند الله أقرب .. من لمح البصر

شادى الحفلة طنَ .. و الأكليل سفر

والنشاب توتَر .. للفاطر غفر

ظبى الريم تبختر .. للآساد ظفر

معنى الحفلة كاين .. فى واحد نفر

ورينا النشاهد .. لى دارة القمر

و أتكى فى المبنَّى .. ولوُليبو الثمر

و الجيد المحزز .. نسِّفبو العمر

مره و مره أجدعه .. فى طى الضَّمر

الكتف المهدل .. و الجسم إنتبر

و الصاد المزمزم .. و الغيم و التَّبر

و الضَّهر المتنَّى .. و التيه يا الأبر

دا الخلانى ساهر .. ماء عيني تبر

لاجم كتفه كفله .. ماج جيدُه الوفر

عرعم ديسه درعه .. فى بعض إنضفر

حاكى الغيم تنَّقل .. يا غالى النَّفر

قول للوزَّه غُورى .. فى عينك ضفَّر