ياقايد الريم وش حالك

وش حال حال الهوى وياك

باقي هوانا على بالك

ولا أنّسى والزمان أنساك

طيفي مع الليل ماجالك

من غفوة النوم ماصحّاك

مثلي ونا امسي على خيالك

وصبح بصبحي على ذكراك

إن رحت فالود يبقى لك

يبقى على شفك ورجواك

وان جيت رحبت بوصالك

حياك يامهجتي حياك

القلب كله لك الحالك

يعشقك ويحبك ويهواك

ويحب من حبك ظلالك

ويحب فوق الوطا ماطاك

يهنا لو الوصل يهنا لك

ويرضى لو البعد عنه أرضاك

وجعل السعد ياحلو فالك

والله يهنيك في دنياك