اكتشف الجديد دخول
الله أكبر . الله أكبر..اذن الاذان

وبنصليك يا صبح الخلاص حاضر...

وبنفتح دفتر الاحزان من الاول وللأخر

ونتسآءل منو الربحان منو الخاسر

منو الكاتل منو المكتول ..

منو القدام ضمير الدنيا يوم

الواقعة كان موصوم وكان مسئول

منو العمق عزه جوه فينا

وماهماهو يوم الهجره للمجهول

منو الاتفش ولع نارو في المحصول

من المحصول

وتاني اتغشه ماعاين عشان

يتأمل العيش الملا القندول

منو العسكر مع الطغيان

منو السلم صغارو الغول

منو اللمع نعل كاتلنا

يوم كاتلنا كان مخبول

ومنو الغنالنا ساعة الحارة

يا اكتوبر المحمول علي الاكتاف

يا اكتوبر المكتوووول

وبعد الصحوة والاذان

ليك بغني ياشعبي وفيك اقول

مافي غيرك لا اسم لا رسم

مافي غيرك لا حقيقة ولا قضية

دربي دربك..مجدي مجدك

جرحي جرحك عز مسطر

في البيارق والهوية

صوتي صوتك..حدي حدك

وعيي وعييك عين بتسهر

في المراكز وقلبي راكز

وايد بتضغط في زناد البندقية...

حبيبنا الشعب ياقادر و يا نادر

دا البخونك داس كرامتو

زي مقاتل خان قضيتو

وباع سلاحو وعادا رايتو

حبيبنا الشعب

يا قادر ويا نادر

دا البحبك والبعزك

مابداين ما بهادن

حتي لو حانت نهايتو

وفيك يحب الاحترام ..

وليك ومنك لازم يعرف

ايه هو معني الالتزام