في الليالي الوضح .. والعتيم الصبح .. لاح لي وجه الرياض ..
في الليالي الوضح .. والعتيم الصبح .. لاح لي وجه الرياض ..
في مرايا السحب .. كفها فلت جديله من حروف ..
وقصة الحنا طويله في الكفوف ..
من ندى عطر الرفوف .. لين صحاه في ثيابك ..
وفي الهبوب ..

أنثنينا.. يا هبوب النعاس .. والحلم .. ألف غصن من اليباس..
فز.. لاجلك وانثنى .. اكسري الأوهام.. كأس.. والمواجع.. فم..
وان عشقتيني انا..ما أبي من الناس ناس ..
ما علينا لو طربنا وانتشينا..
آه ما أرق الرياض تالي الليل..
أنا لو أبي .. خذتها بيدها.. ومشينا..

يا نصيبي من الصور .. والرسايل ..
ومن كل شمس قايمه .. ومن كل ظل مايل..
يا مكاني من البيوت .. ومن الصحاري اللي فرقت فكري.. قبايل..

وين أحب الليله .. وين أهيم ؟
اقبلي مثل ديم .. ومثل نار في هشيم..
في غصون الضي .. من ليل الغضا..
وبين ما خلا النخيل من الفضا.. ومانسى الغيم ..

اقبلي .. يا بخت لي عيوني من الربيع..
وطل وجهي من الشتا.. ومثل صوتي من الهبوب..
اقبلي مثل الرياض .. من تعاريج الدروب..
في ضلوع الوادي .. وين حبيتك .. قمر ..فوق طين اجدادي..

أرفعي طرقة الشيله عن سديم..
وكوكب وهاج .. وأقطعيني بنصل .. طرف سادر وحجاج ..
شققيني .. يالرياح العارضيه .. واهدميني سياج ..
لين أغني .. الهوى ما هو خطيه .. آه ما أرق الرياض ..