لاح الحزن في ليلة واجهر الشوف يبرق ويرعد بالنواظر سحابه

بين النواظر صار بين ومكشوف في ساعة نوره وعد الركابة

في سبة اللي مات وعيوني تشوف فوق الصدر نزاع الارواح صابه

جاه ونزع روحه وخذاها من الجوف قدام عيني راح مني نهابه

مات وترك راسه على الصدر منسوف جسم بليا روح كلن درى به

صار الحزن في خاطري يشهر سيوف قطع خفوقي يوم فصخ ثيابه

فصخ وغسل ثم طيب وأنا اشوف كفن ودمع عيني مثل وبل السحابه

وعقب الفجر شلناه للعود منسوف على النعش ما يوحي اللي حكى به

ونزل بقبره بين الاعضاد ملفوف ومدد من حوله جميع القرابه

حطيت لبنه تحت راسه من النوح فكيت عن وجهه بيدي حجابه

صفوا عليه من اللبن عدة صفوف خلطت من دمعات عيني ترابه

قاموا يهلون الرمل هل بكفوف لين اندفن قبره ونصب نصابه

قمت اتعبر والعرب حولي وقوف حولي قبل قلبي تزايد عذابه

ذكرت ابوي اللي مع الناس معروف حسن التعامل والوفا والوداده

امس يكلمني وينطق لي حروف لي من تكلم خاطر اهتنا به

واليوم فارقني ورافقني الخوف والقلب للهوجاس انهج بابه

ياليت موتي صار من قبل ما اشوف ليته سطا بي واتركه ما سطا به

لا شك هذا الموت والموت معروف لي جاء يسل الروح محد درابه