ما هو عارف قدمو المفارق

يا محط أمالى السلام

من بروق الليل لاحلو بارق

لم يزل يرتاد المشارق

كان مع الأخباب نجمو شارق

مالو والأفلاك فى الظلام

من علايل أبروف لى المدالق

من فتيح لى الخور لى المغالق

قدله يا مولاى حافى حالق

بالطريق الشاقى التٌرام

يا جميل يا نور الشقايق

أملاء كاسك وأفكُر دقايق

مجلسك مفهوم شوفو رايق

عِدو ناقص زول ولا تام

يا بلادى كم فيكى حازق

غير إلاهو ما أمَ رازِق

من شعارو دخول المأزِق

يتفانا وشرفك تمام

فى يمين النيل حيث سابق

كُن فوق أعطاف الوامق

الضريح الفاح طيبو عابِق

السلام يا المهدى الإمام

الحبايب لفتو الخلايق

بينى بينم قطغو العلايق

كان دلال كان تيه كلو لايق

نحن ما ملينا الحِصام

مسرح الغُزلان فى الحدائق

والشوارع الغُر والمضايق

قولى كيف أمسيت دُمت رايق

ودام بهاك مشمول بالنظام

يا دهر أهوالك تشارق

فيه كم كم شابت مفارق

ما علينا الفات كلو فارق

رُقنا ولا نعيد الملام ؟