اكتشف الجديد دخول
يارقيق المشاعر وين راح الحنان

ليه ماشلت قلب طاح قدام عينك

الزمن هو زمانك والمكان المكان

واخر الشعر كلمه تسألك عنك وينك

من تقهويت صوتك سولف الزعفران

عاد وشلون فنجالن تمده يمينك

تذكر شلون كنا والزمن كيف كان

يوم لاغبت عنك مااسمع الا ونينك

اشعر بخوف مدري كنت احس بامان

يكفي ان جيت يمك طار فيني حنينك

وشكثر كنت وافي واقرب الناس خان

بس اثق فيك حتى لو عيوني تدينك

راحت اسنين من عمري وعمرك ثمان

يوم شحت سنيني عوضتني سنينك

زان عمري بقربك يعني الوقت زان

حتى جرد القصايد ربعت في يدينك

طول عمري وانا لاوي اذراع الهوان

شفت يومك بعيني منهو يقدر يهينك

مذكر اني نسيتك واذكرك من زمان

واذكر اني ضحيه بين قلبي وبينك

تدري وش جابني لك لاتقول الحنان

جيت بشيل قلبن طاح قدام عينك

يارقيق المشاعر وين راح الحنان !!!