على الله يازمن بشكي جروحي والليالي طوال

عسى راعي العنا ينسى عناه وينشرح صدره

على الله يازمن بشكي همومي و(الهموم جبال)

تعدّت عاصمة حزني حدود العالم بأسره

خساره يالسنين اللي كتبتي سيرة الرحال

فرحت أمس وحزنت اليوم بس الخوف من بكره

لساني كم (شكى صمته) والى منّه حكى ماقال

طغى (طبع السكوت) بسيرة المحروم من صغره

سقى الله يوم كنت اضحك وبالي مستريح البال

ضحوكٍ ماعرفت الحزن وش معناه وش قدره

وكبرت وكبرت أحلامي وصارت قصة الترحال

أماني في مهب الريح وحلمٍ (ماكتمل) بدره

بعذر اللي مع أيامه جلس (يبكي) على الاطلال

تذكر ماضي أفراحه الين (خنقته العبره)

عزيزه يالعيون اللي حضنتي (دمعة) الرجّال

حبستي دمعته بين المحاجر يوم (ضاع) امره

عزيزه يالحروف اللي (سكتي) والكلام يقال

حكيتي.. (ماشكيتي) الهمّ وهمّ القلب (ياكبره)

عزيزه ياليدين اللي ثنيتك (باصعب) الاحوال

اكفّك ساعة الحاجه وامدّك ساعة القدره

وعزيز النفس لو يصبر على (صبر) الليالي نال

ابصبر والرجل يصبر ومقياس الرجل صبره

انا منهو (حمل همّه على راسه) تقول عقال

مجاديف الزمن (دارت عليه) ونَسّف الغتره

وانا منهو فقد صوته وبعض الصوت به مازال

دعيت الله يفرّجها عليّ (وبحَّت النبره)

أشيل الحمل عن غيري وحملي صار (ما ينشال)

كما الشيخ الهزيل اللي مشيبه (منقضٍ ظهره)
(جروحي مزنةٍ ) منها هطل فيض الشعر همّال

سقت جدب العروق اللي تبلل ريقها قطره

وعن (حر الزمن) صارت حروفي للجروح ظلال

تذرّت عن (هبوب الياس) حلمٍ قد بنى قصره

عساها للمطر روحٍ بها وادي (الظما) ماسال

عروق سنينها جفّت وورّاها (الزمن غدره)

عساها للمطر روحٍ قضى مرباعها ماطال

كساها (ثوبها الاصفر) .. وكانت تلبس الخضره

على الله ينجلي وقتٍ قضيته (همٍ) و (غربال)

ويشعّ النور في قلبٍ غشى (ليل الظَلَم) فجره

(على الله) والولي الله وبامر الله يزين الحال

ويضحك للزمن قلبٍ مع (همومه) قضى عمره