صباح الفل

يا أحلى حاجة في الدنيا

يا ضلة تينة في الصحرا.. وبير مية

يا سحر المتعة والفرحة.. يا جنيّة

يا قالبة صمت ليل الغربة أغنية

صباح الفل

يا أحلى ضحكة عرفوها البنات السمر

يا كنز الرحلة والأيام

يا تحويشة سنين العمر

وتحويشه ليالي الصبر

وانا ظالمك وبتمادى

ولما اغضب ولما اسخن تحطي ايديكي كماده

تهون كل الجروح عندك

وتضحكلي الحاجات اللى مضحكتش بقالها سنين

ولما التوهه تسرقني

عينيكي بتوصف العناوين

وبتطبطب على الواد اللى مبيكبرش جوايا

وتصحى الصبح تغسل كل وجع الليل بضحكتها

وطلتها قمر طالع

وبتحوش يوماتي العشق فى جيوبي

بزين الحسن والطابع

وتديني تلات اطفال يشيلو اسمي

ابص فى عينها القاني انا الرابع