يامرحبا يامعنَّى خط الأقلامِ

مثايلٍ شوَّقتني في معانيها

حي المثايل ياسلالة نسل الكرام

يامن بيوته عن الزلاَّت يحميها



من داثر الوقت وهذا طبع الايَّامي

مرَّات تصفى ومرَّات الكدر فيها

كم واردٍ ضاميٍ صد درب الاحيامي

وكم واردٍ شرب من صافي مغانيها



لاتنظر الَّلي مضى وتعد الايَّامي

أرعى ربيع الزَّمان أول لياليها

حلو الَّليالي تعوَّض مر الايَّامي

مايحسب الوقت ويفكَّر في ماضيها



لو كان مابي كتبته جفَّت أقلامي

من حرَّتي أبدع أمثالي وأغنَّيها

ردار فكري يصوَّر لي مضن زامي

في هندس الَّليل يوم أرتاح غافيها



يوم الخلايا تِنام وفكرها نامِ

حرام عيني لذيذ النَّوم يغفيها

حالي كما عشب صيفٍ صابه الضَّامي

وإلا كما وردةٍ جفَّت نواديها



نار الغضى والتوقَّد في بحر طامي

خالد وعيَّا مولَّعها يطفَّيها

ريمٍ رعى في الفياض وزهر الأوسامِ

قايد خشوف الجوازي في مِفاليها



بأرض المحيله ولو تاطاها الأقدامِ

تِزهى وتِضحك لها الدَّنيا ومافيها

سود الَّليالي مع سالفات الايَّامِ

نأخذ مجازمها ونترك لياليها



نمشي على درب ماتاطاه الاقدامِ

وإن وعرت الأرض يعجبني المشي فيها

ياخوي أنا ريت رويان وهو ضامي

ياكيف عطشان في جاري سواقيها



ريَّح ضميرك ولو هيَّم بك هيامي

حقاً على الَّلي جرح نفسك يداويها

يامفطر الوقت هذا شهر الصَّيامي

وليلة القدر في آخر لياليها



يازين هدَّ الوحش بعض الايَّامي

في ديرةٍ قفرةٍ عسره مضاويها

أشقر طويل المعنَّق يبري العظامي

صوايده مِن فنادي الصَّيد يدميها



ياشيخ هذا زمانٍ كلِّه انعامِ

الذيب جايع وشبعانه حصانيها

لو كان يبغى يغزَّر نابه الدَّامي

ياكيف تكسر جوارحها ظواريها



وكل مخلوق في الدَّنيا فلا دامي

لابد تنهي مغازلها مطاويها

وآخر كلامي بحرف السين واللامِ

والميم والعين تِتلاها قوافيها