شئ مش مفهوم، صداع في دماغي طول اليوم

كتر التفكير ازاي الضغط علينا كتير

ليه مش عارفين نمشي في شارع مش خايفين؟

و المعاكسات مالية الطرق والميادين

فين أيام زمان؟ الشهامة راحت فين!

كان فيه احترام بين البني آدمين

دايما بيقولوا علينا ان احنا الغلطانين

ده اللي بيحصل شايفينه وساكتين

كل اوتوبيس، كل شارع، في الجامعة، وفي التليفون

في ناس كتير بتعاكس، الواحد مصدوم

أطفال بتعاكس في السينمات والشارع وقت الاعياد

ويقولوا للبنات يا جميل أنا مش بعاكس

وعندي عربية وشقة وجاهز

ليه في أي مكان بنمشي فيه بنسمع ف كلام؟

و مفيش أمان ياريتنا نرجع زي زمان

كل البنات حتي اللي لابسين عبايات

فين القانون علشان يجيب حق البنات!

و لما الناس يتلموا يتقال "معلش خلاص"

"ما كفاية بلاش فضايح ليه تلموا عليكوا الناس!"

لما نروح القسم نبلغ ونقول محناش ساكتين

الناس يقولولنا احنا مش شاهدين!

دايما بنلاقي تبرير من الصغير للكبير

ونشوف العيب ونسكت، راح فين الضمير!

من قبل ما يعرفوا حصل ايه يسألوا كانت لابسة ايه

ويلوموا علينا كتير

ليه راضييين ده يحصل فينا؟ ليه يجيبوا الغلط علينا؟

ليه محدش حاسس بينا؟ مهما اتكلمنا واشتكينا

متحسيش ان العيب فيكي

لبسك، شكلك و كلامك دي حاجة ترجع ليكي

متخليش حد يلوم عليكي، وأكيد في يوم هيحصل تغيير

مش عايزة أرجع اسكت تاني، مش هفضل خايفة طول حياتي

مش عايزة أفكر واشغل بالي، ولا يجي حد يقولي عادي

مش عايزة اخاف تاني