اكتشف الجديد دخول
تعيشي معايا في الجنة تملّيها

وتخرج منها بارادتك ونتفارق

وتكدبي كدبة في خيالك تعيشيها

وتعملي اني مش فارق، وانا فارق

وترجعي تاني بعد البعد ما يهدك

ويضعف قلبي من الدمعة اللي على خدك

وكالعادة تقولي وانتي حاضناني

انا آسفة ومش هعمل كده تاني

وترجعي تاني نتفارق، وبسذاجة

تروحي لسكة النسيان وتمشيها

وتشغلي وقتك الفاضي بكام حاجة

دواير عايشة طول عمرك تلفّيها

وترجعي تاني بعد البعد ما يهدك

ويضعف قلبي من الزعل على قلبك

وكالعادة تقولي وانتي حاضناني

انا آسفة ومش هعمل كده تاني

لكن المرّادي غير كل اللي قبليها

لقيت نفسي خلاص وارتحت في غيابك

ومن كتر الحاجات اللي عملتيها،

آدي اللي انتي كتير سبتيه خلاص سابك

مترجعيليش، ومهما البعد هيهدك

خلاص مش فارقة كام دمعة على خدك

بقولهالك عشان البعد قسّاني

انا آسف ومش هعمل كده تاني