يابو عيون وساع ..... والرمش البتاع ... تقتلني بنظراتك .... وتزيد بصدك

إلمحني بعينك ... يا لبى زينك .... دامك تمشي بين الناس ... وآلا احد قدك


مريت ليل الهوى واثر القمر غايب
ما تنفع نجوم ليلي من ورى غيابه


لا لا عن عشقه حشى لا ماني بتايب
وانا ذقت الموت من توته وعنابه

سلهم بالنعاس .. وميل يالمياس .... هذي ليلة برد ولا ..هذا قدك ..

ويالقلب الشفاف ... مثلك ما ينشاف ... بحت بمكنوني لعينك ... ما بحت بسدك


ذوب قلوب البشر يالمترف الذايب
غلاك جيت اطرقه واوقف على بابه

خذني على قد عشقي ماني ب هايب
انا انطح الموت من قبل أعرف أسبابه



يالزين الرعبوب .... ذوبني واذوب ..... ما دام ان حب الرمان ... يقطف من خدك


يالوجه البدري ... والعطر الخمري ... كلي لعينك يا بعدهم .. كيف آردك !؟


خذ مني إحساسي المتواضع السايب
وارسم على قلبي حروف اسمك كتابه

شيبت فيني وانا ما جيت لك شايب
سرقت مني عقل وشعوري نهابه

يابو جديله ... وبالمشيه ميله ... يسعد عين أمك وآبوك .. ويسعد جدك

ومن مثلك يكون ... يالترف المزيون ... شرق باحساسي وغرب .. وانا اطلب ودك


قلبي بعد حضرتك من هالبشر طايب
يرقابي إحساس نبضك قبل لارقابه

يا ماخذ القلب ومودي به وجايب
يا موتي اللي عشقته واعشق أسبابه