احن

حن ....

وآنه حن

وأنحبس ونه.....ونمتحن

مرخوص بس كت الدمع

شرط الدمع

حدة الجفن

جفنك جنح فراشة غض

وحجارة جفني وما غمض

يلتمشي بيه ويه نبض

روحي على روحك تنسحن

حن بويه حن

عيونك

زرازير البراري

بكل نشاط جناحها بعالي السحر

والروح مني عوسجة بر

ما وصل ليه النده ولا جاسها بقطرة المطر

وصفولي عنك بالنباعي تفيض

وتعنيت ليله .... ويه القمر

وصفولي عنك كل مسامة تفيض

منك عطر....يلحسنك نهر

تنزل بصدري ويه النفس وبدمي

غصبن تنعجن

وأشهقك وأصعدك للسمة

بحسرات وبعنة حزن

حن .... بويه حن

شفافك ولا قولن ورد....

عنابه معقوده عقد

تمتلي بقد ما تنمرد

لاهو دفو لاهو برد

آنه بوصفه راح أجن

سكتاتك تشكل خواطر بالقلب....

مالي عرف بيهن قبلْ

مبروم بره الريزه

ياريان ومخوصرخصر

لف العقلْ

كل جلمة منك....

نبعة ريحان....بالدلال....

ما تحمل ثقلْ

وصفولي عنك

وردة القداح ريش جناح

زاهي بالسحرْ

وصفولي عنك

شال منك غيظ بستان الورد

والنرجس الرايج سكرْ

حني بفوازير ولحن....

حنة حمامات السجن

حنه إلي....

وجنه إلك....

واللي يعجبه خل يحن

حن بويه حن

آنه من أشوفك

يمتلي الماضي الجدب

زهرات بيض من الوفه

وروحي سواجي من الحنين تصير

وأتنبه وقت بيه غفه

يا محجل إن مريت بيه ردود

أرد أردود للعشرين....

من عمر الجفه

وأنصف عمر منك

نصفته بالهجر....

والهجر منك ما كفه

حتى الهجر يا روحي

منك ما كفه

وقلبي أعله هجرك كام أيحن

حن....بويه حن

حن ...

وآنه حن

وأنحبس ونه ...

ونمتحن

مجبور أرخصك على الدمع

شرط الدمع يجوي الجفن