ياسايق الفيات

عود بى واخد سنده

بالدرب التحت تجاه ربوع هنده

بوصيك قبل تبدا

سيرك داك طريقك صابق الربده

منك بعيد جبده

حى هنده المراد ميل بى ربوع عبده

اطوى الارض واضرع

من افكارنا سيرك يالفيات اسرع

ميل على المشرع

لا تريع القطيع بتجفل الادرع

شوف سايق الفيات الليله كيفن هاش

والشدر الكبار بقى شوفنا لينا طشاش

قولي دحين وين ماش

فارقت الطريق أتيامن الرماش

شقا حشا الطريق واتيمم الحلال

زفنو الكلاب مانالن إلا علال

فاضلات ثواني قلال

بينك والغروب داك مشرع الشلال

يازين الشباب ياطيب الأخلاق

يا أمين الصديق والناس على الإطلاق

من ايدى الصناعة يبعد المعلاق

انظر للطبيعة ومجد الخلاق

انزل ياصديق وشوف يد القدرة

شوف حسن البداوه الما لمس بدره

وراد النهر هم اردونى لم اردى

الكاتلين الصفار أم نضرة الخضره



شوف النهر مار تقول هجسان

او مر المنام بي مغله النعسان

جلت قدرتو مااكفر الانسان

كم ينسى الجميل كم يجحد الاحسان

مانفرن تقول سابق الكلام الفه

عطشان قلت ليهن وصحت البلفه

مافيش كاس قريب قالن بدون كلفه

تشرب بكفوفنا حتى تتكفى

ياسلام........ يا سلام